Presidenti Ilir Meta ka ngritur sot shqetësimin me ndërtimin e disa HEC-eve në vendin tonë, që sipas tij, ushtrojnë aktivitete armiqësore në zonat e gjelbërta. I pranishëm në tryezën me temë “E ardhmja e lumit Vjosa”, kreu i shtetit pohoi se mbështet iniciativën për ndalimin e ndërtimit të HEC-eve mbi lumin Vjosë.
Meta dha alarmin se ngrihen aktivitete armiqësore në zonat e mbrojtura. Në fjalën e tij ai tha se lumi Vjosa është me vlera të veçanta, ndërsa kërkoi nga ana e qeverisë rishikimin e planeve. “Shteti shqiptar të ruajë vlerat e natyrës”, ishte thirrja e radhës nga ana e Metës, ndërsa nënvizoi se planet ndërtimore kërkojnë debat. Sipas tij, qëndrimet kokëforta nuk i shërbejnë vendit, ndërsa shtoi se do të mbështeste ndalimin e digave mbi Vjosë dhe shpalljen e saj Park Kombëtar.
“Lumi Vjosa është një pasuri natyrore për vendin. Ndërtimi i HEC-eve në shkallë të gjerë dhe hapësirat jo miqësore dhe armiqësore në zonat e gjelbërta, s’mund të jetë në rrugë e blertë për zhvillimin e vendit.
Shkencëtarët këmbëngulin se HEC-et shkaktojnë dëme në sipërfaqet e ujërave, deri në ashpërsimin e klimës deri në ngrohjen globale. Shqetësim bën dhe cilësia e hartimit të raporteve për ndikimin në mjedis të HEC-eve.
Ato shpesh përgatiten në tavolinë në mënyrë të shpejtë, dhe shpesh miratohen ato që do qeveria dhe koncesionari. Këto ditë jam vënë në dijeni për një letër të hapur nga komuniteti europian, për një shqetësim për HEC-et.
Çuditërisht këto kambana nuk dëgjohen. Shteti shqiptar duhet të ruajë vlerat e natyrës dhe të shëndetit të njeriut. Do të mbështesja ndalimin e digave mbi Vjosë, dhe shpalljen e saj Park Kombëtar. Çdo qëndrim kokëfortë, s’do i shërbente të ardhmes së vendit dhe rrugës drejt BE-së. Çdo shqiptar duhet të shkojë në lumin Valbonë, që është për të vënë duart në kokë me atë ç’ka është bërë”, tha Meta.
