Ministri i Brendshëm, Fatmir Xhafaj ka folur lidhur më çështjen e Arbër Çekajt. Xhafaj u pyet nga mediat, teksa ishte i pranishëm në ambientet e Task-Forcës Speciale, pas një takimi me Presidentin e Policisë kriminale gjermane, BKA.
Ministri u shpreh se ‘kjo nuk është më çështje ekstradimi, por çështje hetimi të përbashkët’.
“Pyetje interesante, ka një ndryshim tashmë, nuk kemi të bëjmë më me një ekstradim, por me hetim të përbashkët, kjo u takon hetimit të krimeve të rënda, prokurorisë shqiptare dhe zyrës përkatëse të policisë gjermane”, ishte kjo deklarata e Xhafës për Çekajn.
Arbër Çekaj aktualisht ndodhet në Gjermania, ndërsa pak muaj më parë u gjet një sasi e madhe droge në kamionin e kompanisë së tij me banane në Maminas.
“Kemi pasur diskutime me shumë interes me drejtuesit e policisë së shtetit por dhe drejtues të task-forcës “forca e ligjit”. Pamë se çfarë kemi bërë e çfarë mund të bëjmë më shumë në të ardhmen dhe bashkëpunimi me partnerët tanë gjermanë dhe policisë kriminale gjermane mund të konsiderohet model.
Ka pasur rezultate konkrete dhe angazhime për këtë bashkëpunim, është krijuar një nivel marrëdhënie besueshmërie e reciproke që është konkretizuar në bashkëpunim me policinë gjermane”, tha Xhafaj.
Nga ana tjetër, presidenti i policisë gjermane Hezler u shpreh: “Gjermania dhe Shqipëria po bashkëpunojnë ngushtë. Ka shqiptarë që jetojnë në Gjermani dhe gjermanë që jetojnë në Shqipëri. Për fat të keq ka që me veprimtaritë e tyre kriminale i bëjnë dëm shoqërisë. Ne kemi oficerë ndërlidhës. Nëpërmjet task forcës speciale bashkëpunimi po merr edhe një shtysë më të madhe. Bisedat që patëm me ministrin treguan se duhet të nisin përpjekje të reja për të luftuar ata që kryejnë veprime kriminale madje t’i konfiskojmë dhe fitimet e arritura.”
