Teksa na ndajnë 1 muaj nga zgjedhjet parlamentare të 25 prillit, gazetari Arian Çani, ka deklaruar se do të jetë lajm i mirë nëse do të ketë fushatë të egër elektorale deri në vrasje.
Në një intervistë për MCN TV, Çani ka dhënë këtë përgjigje teksa është pyetur në lidhje me fushatën e zgjedhjeve të 25 prillit, që do të fillojë, ditën e nesërme.
Ndër të tjera, ai u shpreh se pa një ngjarje të madhe nuk do të ketë ndryshim, nga fushatat e viteve të kaluara, duke shtuar se një akt i rëndë mund të ndryshonte rrjedhën.
Arian Çani: Nuk bëj dot parashikim. Skenari më i keq është se ka një përplasje ende pa nisur fushata. Unë them do jetë “lajm i mirë” nëse do të ketë fushatë të egër deri në vrasje. Fatkeqësisht vetëm një vrasje e madhe e bujshme e nivelit të lartë do të fusë Shqipërinë në një epokë të re, që mund të jetë e mirë ose e keqe. Pa kryer një akt të madh politik, të fortë, mendoj se nuk do të ketë asnjë ndryshim nga fushatat e tjera. Vetëm një akt i rëndë e bën fushatën interesante. Uroj të mos ndodhë, por do ta fusë vendin në shina të reja, se edhe kështu është trishtim i madh, është bërë rutinë.
