Ministri i Jashtëm në detyrë, Genc Cakaj teksa ndodhet në New York, ka marrë pjesë në darkën e shtruar nga përfaqësuesja e lartë e BE-së, Federica Mogherini me delegacionet nga Ballkani Perëndimor. Fokusi i kësaj darke ka qenë integrimi i Rajonit në BE dhe tek thellimi i mëtejshëm i bashkëpunimit.
“Thelbi i diskutimeve të këtij takimi ishte shqyrtimi i përgjithshëm i situatës politike në rajon. Në përgjithësi, u dakordësuam se mbyllja e çështjeve të hapura në Ballkanin Perëndimor është thelbësore për të garantuar jo vetëm stabilitetin, por edhe zhvillimin e përgjithshëm socio-politik të tij. Po ashtu, nga të gjithë të pranishmit u theksua nevoja për hapjen e negociatave për anëtarësim në BE të Shqipërisë dhe Maqedonisë së Veriut në tetor”, shkruan Cakaj në një postim në rrjetet sociale.
Kreu i diplomacisë shqiptare nënvizon se vazhdimi i procesit të zgjerimit të BE-së në Ballkanin Perëndimor është i një rëndësie të posaçme për thellimin e reformave, për të ndihmuar procesin e mëtejmë të demokratizimit dhe për të konsoliduar orientimin evropian të rajonit, në përgjithësi. “Procesi i anëtarësimit në BE nuk ka asnjë alternativë për asnjërin nga vendet e tjera të Ballkanit Perëndimor”, mbyll postimin e tij Cakaj.
