Në mbledhjen e Këshillit Politik, mazhoranca nuk ka mbështetur nismën e opozitës, për hapjen 100% të listave.
Përfaqësuesi i PS në Këshillin Politik, Damian Gjiknuri është shprehur se PD dhe LSI duhet të gjejnë 28 deputetë që ta propozojnë në Kuvend si nismë ligjore.
Pas përfundimit të mbledhjes pas 2 orësh, Oerd Bylybashi dhe Petrit Vasili u shprehën se nëse listat duhet të hapen, hapja duhet të jetë 100%. Ata theksuan se koalicionet dhe shpërndarja e mandateve nuk duhet të ndryshojnë.
“Opozita e bashkuar bëri prezent në Këshillin Politik qëndrimin e saj të qartë. Nëse do shkohet drejt hapjes së listave ato duhen hapur 100 % me kushtin që formula e koalicioneve dhe formula e ndarjeve të mandateve të mos ndryshojë.
Është fare e qartë për shqiptarët se Edi Rama hapjen e listave e ka alibi. Është një farsë dhe një justifikim për Edi Ramën në funksion të qëllimit për të ndryshuar rregullat e garës.
Përfaqësuesi i mazhorancës refuzoi gjithë kohës propozimin tonë edhe pse ne i dhamë modelet e vendeve të tjera siç janë Belgjika, Danimarka, Italia, Letonia të cilat e kanë përdorur prej 17 vjetësh. E gjithë kjo përpjekje është për të vrarë mundësinë e partive politike për të garuar në liri të plot.
Ne presim nga mazhoranca të reflektojë, kjo është një çështje e Këshillit Politik, dhe si e tillë duhet diskutuar në Këshillin politik. Çdo lloj përpjekje e mazhorancës është e kotë në sytë e shqiptarëve”, tha Bylykbashi.
