Buxheti i shtetit për vitin 2018, është ligji më i rëndësishëm financiar në vend. Ai është botuar në fletoren zyrtare, duke marrë trajtën përfundimtare, ndërsa në 1 janar të vitit 2018 ai bëhet plotësisht efektiv.
Në relacionin që e shoqëron, buxheti i vitit 2018 do të mbështesë rritjen ekonomike dhe vazhdimin e reformave të rëndësishme që tashmë kanë nisur për të gjetur zbatimin e tyre. Buxheti do të mundësojë rritjen ekonomike, ndërsa investimet publike kanë në fokus infrastrukturën, por edhe bujqësinë.
“Treguesit kryesorë të buxhetit janë të ardhurat për vitin e ardhshëm janë parashikuar në vlerën 464.7 miliardë lekë, ose 28.2% të PBB, ku peshën kryesore të tyre do e mbajnë te ardhurat nga tatimet dhe doganat me 317.5 miliardë lekë. Më pas renditen të ardhurat nga fondet speciale me 88 miliardë lekë, të ardhurat jo tatimore me 25.7 miliardë lekë, ndërsa të ardhurat nga pushteti vendor janë planifikuar në masën 18.7 miliardë lekë”-shkruan Scan.
Po sipas këtij ligji shpenzimet buxhetore për vitin e ardhshëm janë parashikuar në masën 497 miliardë lekë, ose 30.1 % e PBB. Edhe në këtë vit pjesën më të madhe e zënë shpenzimet korrente me 407.9 miliardë lekë, ndërsa shpenzimet kapitale janë planifikuar në vlerën 86.3 miliardë lekë ose 5.2 % e PBB. I gjithë viti buxhetor është parashikuar të shoqërohet nga një deficit prej 32.3 miliardë lekë, ose 2 % e PBB.
