Kryeministri Edi Rama ka marrë pjesë sot në një takim me sistemin bankar, ku ka shfrytëzuar rastin për t’iu përgjigjur deklaratave të kryetarit të PD Lulzim Basha, i cili kërkoi që FBI dhe DEA të merren me kontrollin e buxhetit të shtetit shqiptar.
“Nëse ka një sistem ku ekonomia informale apo ajo e zeza s’ka shans të penetrojë ky është sistemi bankar dhe nëse ka në Shqipëri një sistem për t’u marrë shembull për nga qëndrueshmëria e shendetsheme në raport me ligjin dhe transparencën, sa i përket burimeve të fitimit, ky është sistemi bankar.
Dje kam dëgjuar që imagjinata që nuk më mungonte s’ma kishte thënë kurrë që mund ta dëgjoja, që projekt buxheti të administrohet nga strukturat ligjzbatuese FBI-DEA. Tani ju të gjithë këtu jeni në duart e krimit dhe jo vetëm ju që jeni pa kufje apo edhe ata që janë me kufje, madje ata që janë me kufje janë më të dyshuarit, është për të qeshur edhe për të qarë se këto janë sinjalet më dëmtuese për konsumatorin. Ndaj dua t’u them atyre që janë të detyruar të dëgjojnë të tilla shpërthime të imagjinatës të qeshin e të shkojnë përpara se realiteti ekonomik është optimist”.
