Eksportet kanë shënuar një rritje të ndjeshme në tre muajt e parë të vitit, të ndikuara nga rritja e çmimeve në bursat ndërkombëtare të naftës dhe metaleve si dhe nga përmirësimi i industrisë së tekstileve e këpucëve.
Sipas INSTAT, në këtë tremujor eksportet e mallrave arritën vlerën 120 mld lekë, duke u rritur me 49,6 %. Grupet që kanë ndikuar pozitivisht në rritjen vjetore të eksporteve, janë: “Minerale, lëndë djegëse dhe energji elektrike” me +18,5 pikë përqindje, “Materiale ndërtimi dhe metale” me +14,4 pikë përqindje, dhe “Tekstile dhe këpucë” me +6,4 pikë përqindje.
Rritjen më të lartë e ka shënuar grupi “Minerale, lëndë djegëse, energji”, që u zgjerua me 95.4%, në 30 miliardë lekë të ndikuara kryesisht nga rritja e çmimit të naftës në tregjet ndërkombëtare. Ky grup kaloi sërish në të dytin më të madh në vend, me 25% të totalit.
Në rritje të fortë ishin dhe eksportet e “material ndërtimi e metale”, që u zgjeruan me gati 77.4%, në 26.5 miliardë lekë edhe këto të ndikuara nga konjuktuara më e përshtatshme e çmimeve. Ky grup kaloi në të tretin, me 22% të totalit.
Edhe “tekstilet e këpucët”, që deri vitin e kaluar nuk kishin arritur nivelin e para pandemisë po shënojnë një ecuri të mirë në muajt e parë të këtij viti, si rrjedhojë e rritjes së kërkesës nga partnerët europiane dhe çmimeve më të larta. Eksportet e këtij grupi u zgjeruan me 19% në 32.4 miliardë lekë. Përfaqësuesi e sektorit thanë se ata presin ecuri më të mirë për shkak të riorientimit të prodhimit nga kompanitë europiane pas luftës në Ukrainë. Ky grup vijon të mbetet më i madhi në vend, me 27% të totalit, por pesha e tij po vjen në rënie për shkak të rritjes së metaleve e naftës.
Eksportet e “ushqime, pije e duhan” u rritën me 19%, të ndikuara nga ecuria e mirë e produkteve të peshkut, duke arritur në 10.4 miliardë lekë.
Edhe grupi “Makineri, pjesë këmbimi e pajisje” shënoi ecuri pozitive, me rritje 34.5% për tre mujorin, në 8.7 miliardë lekë, si rrjedhojë e përmirësimit të kërkesës pas pandemisë.
Deficiti tregtar në rritje
Në këtë tremujor eksportet e mallrave arritën vlerën 120 mld lekë, duke u rritur me 49,6%, ndërkohë importet e mallrave arritën vlerën 207 mld lekë, duke u rritur me 27,9%, krahasuar me një vit më parë. Deficiti tregtar arriti vlerën 87 mld lekë, duke u rritur me 6,6%, krahasuar me të njëjtën periudhë të 2021.
Ecuria e tregtisë së mallrave sipas vendeve partnere
Sipas INSTAT, Në muajin Mars 2022, vendet me të cilët Shqipëria ka pasur rritje më të madhe të eksporteve, në krahasim me Mars 2021 janë: Italia (67,1%), Kosova (25,2%) dhe SHBA (9 herë). Ndërsa vendet me të cilat eksportet kanë pasur uljen më të madhe, janë: Greqia (6,0%) dhe Spanja (44,6%).
Gjatë këtij tremujori vendet me të cilët Shqipëria ka pasur rritje më të madhe të eksporteve, në krahasim me një vit më parë, janë: Italia (54,5%), Kosova (52,0%) dhe Gjermania (123,3%). Ndërsa vendet me të cilat eksportet kanë pasur uljen më të madhe, janë: Spanja (66,8%) dhe Turqia (19,7%).
Në muajin Mars 2022, vendet me të cilët Shqipëria ka pasur rritje më të madhe të importeve, në krahasim me Mars 2021 janë: Italia (0,8%), Turqia (53,5%) dhe Greqia (29,5%). Ndërsa vendet me të cilat importet kanë pasur uljen më të madhe, janë: SHBA (9,5%), Kroaci (22,0%) dhe Zvicër (19,0%).
Gjatë këtij tremujori, vendet me të cilët Shqipëria ka pasur rritje më të madhe të importeve, në krahasim me një vit më parë, janë: Italia (12,7%), Turqia (52,7%) dhe Kina (9,1%). Ndërsa vendet me të cilat importet kanë pasur uljen më të madhe janë: SHBA (20,2%) dhe Zvicra (29,4%).
Shkëmbimet tregtare me vendet e BE-së zënë 59,8%, të gjithë tregtisë. Në Mars 2022, eksportet drejt vendeve të BE-së zënë 71,3% të eksporteve gjithsej dhe importet nga vendet e BE-së zënë 53,2 % të importeve gjithsej. Partnerët kryesorë tregtarë janë: Italia (30,4%), Turqia (9,0%), Greqia (6,7%) dhe Kina (6,5%).
Shkëmbimet tregtare, për tremujorin 2022, me vendet e BE-së zënë 60,9% të gjithë tregtisë. Në periudhën Shkurt – Mars 2022, eksportet drejt vendeve të BE-së zënë 73,0% të eksporteve gjithsej dhe importet nga vendet e BE-së zënë 54,0% të importeve gjithsej. Partnerët kryesorë tregtarë janë: Italia (31,8%), Turqia (8,3%), Gjermania (7,0%) dhe Greqia (6,6%). /Monitor
