Përkeqësimi i situatës nga koronavirusi në Britaninë e Madhe ka bërë që kryeministri Boris Johnson të marrë masa të rrepta.
Ai ka paralajmëruar britanikët që të qëndrojnë 1,8 metra larg njëri-tjetrit edhe kur janë jashtë. Johnson ka thënë se nëse kjo distancë nuk do të respektohet, atëherë ai do të mbyllë të gjitha parqet.
Gjatë një konference për shtyp, Johnson tha se nuk do të hezitojë t’i mbyllë hapësirat publike, nëse kjo do të bënte që njerëzit të kufizojnë lëvizjen jashtë shtëpive.
Disa orë më parë u publikuan foto të britanikëve në të gjithë Mbretërinë e Bashkuar, të mbledhur në plazhe dhe parqe duke bërë një shëtitje me të dashurit e tyre me rastin e Ditës së Nënës.
Në një mesazh të ashpër për publikun nga “Downing Street” këtë mbrëmje, Johnson tha se edhe pse ai i kupton përfitimet e shëndetit fizik dhe mendor të vendeve të hapura, do të ndërmarrë hapa drastikë për të mbrojtur shëndetin.
“Unë nuk mendoj se ju duhet të përdorni imagjinatën tuaj për të parë se ku mund të duhet të shkojmë. Do të mendojmë për këtë shumë, shumë në 24 orët e ardhshme. Duhet të mendojmë për llojet e masave që kemi parë diku tjetër, vendet e tjera që janë detyruar të sjellin kufizime në të gjitha lëvizjet e njerëzve. Unë nuk dua ta bëj këtë sepse jam përpjekur të shpjegoj përfitimet e shëndetit publik”, tha kryeministri britanik.
