Britania e Madhe, është bërë vendi i parë në Europë, që tejkalon 50 mijë viktima nga Covid-19, që prej fillimit të pandemisë.
Ditën e sotme në Britani, kanë humbur jetën 595 persona, duke e çuar numrin total të fataliteteve në 50,365. Gjithashtu janë infektuar edhe 22,950 qytetarë të tjerë, në 24 orët e fundit.
Aktualisht vendi gjendet në një izolim të dytë kombëtar, i cili nisi në 5 nëntor dhe do të përfundojë në 2 dhjetor, në përpjekje për të ulur numrin e infektimeve dhe për të evituar kolapsin e sistemit shëndetësor.
Pavarësisht lajmeve pozitive se një vaksinë e Pfizer dhe BioNTech ka treguar efektivitet deri në masën 90% ndaj koronavirusit, kryeministri Boris Johnson ka deklaruar se vendi ende nuk është në fund të tunelit.
Që prej fillimit të pandemisë, sipas shifrave të qeverisë, në Britani janë konfirmuar 1.2 milionë raste të infetuar me Covid-19.
