Një ngjarje e rëndë është shënuar një ditë më parë në Greqi, ku një person i pa identifikuar i ka zënë pritë dhe më pas ka qëlluar me armë ndaj ish-sulmuesit të Juventusit, Darko Kovaçeviç.
Autori i krimit i ka zënë pritë Kovaçeviç jashtë shtëpisë së tij. Një armë është gjetur në vendngjarje, e cila pritet t’i nënshtrohet testit të balistikës, për të kuptuar nëse ishte e njëjta armë e përdorur gjatë sulmit. Policia ka sekuestruar kamerat e sigurisë të vendosura pranë vendit të ngjarjes, për të zbuluar më tepër rreth identitetit të atentatorit.
Ngjarja ka ndodhur pak metra pranë shtëpisë së ish-futbollistit në Glyfada, konkretisht në Rrugën Elpidos 2. Ish-futbollisti Kovaçeviç, në dëshminë dhënë policisë ka thënë se sulmi ndaj tij është kryer kur ka qenë duke parkuar makinën.
“Isha duke parkuar makinën në vendparkimin pranë banesës time. Në atë moment pash një burrë të dilte nga një tjetër mjet aty pranë, i cili me një armë në dorë gati për të qëlluar po vinte drejt meje.
Menjëherë në mënyrë instiktive u shmanga djathtas, ndërkohë ai qëlloi me armë dhe më pas u largua me vrap. Hipi në makinë dhe u zhduk”. Ai është transportuar menjëherë në spital, por pa lëndime serioze.
