Sot është qëlluar mbi një makinë e cila ishte në ecje, e në të ndodheshin dy punonjës të bashkisë Lezhë. Mjeti drejtohej nga Mirel Ndoka, i cili është punonjës i Inspektoratit Ndërtimor Urbanistik Vendor, e bashkë me të ishte edhe Edmond Mhilli, të cilët lëviznin në aksin Lezhë- Tiranë.
Ngjarja, fatmirësisht pa pasoja për jetën ka ndodhur rreth orës 09:50, në dalje të Lezhës, pranë fshatit Tresh. Agresorët, ende të paidentifikuar kanë qenë në një tjetër mjet në lëvizje, dhe janë larguar me shpejtësi. Grupi hetimor dhe forcat policore po kryejnë të gjitha veprimet për zbardhjen e rrethanave, dhe ndalimin e autorëve. Deri tani janë shoqëruar disa persona, dëshmitarë okularë, ndërsa po kontrollohen kamerat pranë vendngjarjes si dhe janë ngritur pika kontrolli.
Njoftimi i policisë
“Sot, rreth orës 09:50, në autostradën Lezhë – Milot, pranë fshatit Tresh është qëlluar me armë zjarri në drejtim të një mjeti ku udhëtonin 2 shtetas, nga persona të paidentifikuar nga një mjet tjetër.
Nuk ka asnjë person te lënduar, por vetëm dëme materiale. Grupi hetimor është në vendngjarje, dhe forcat policore po kryejnë të gjitha veprimet për zbardhjen rrethanave dhe ndalimin e autorëve. Janë shoqëruar disa persona, dëshmitarë okularë, ndersa po kontrollohen kamerat pranë vendngjarjes si dhe janë ngritur pika kontrolli”.
