Ministrja e Shëndetësisë, Ogerta Manastirliu njofton se është gati ngritja e një spitali të ri karantinë.
Gjatë fjalës së saj në mbledhjen online të qeverisë, Manastirliu tha se ngritja e këtij spitali do të fillojë brenda 20 ditëve të ardhshme.
Ajo tha se është bërë një vlerësim për një objekt, që po shqyrtohet për ta kthyer në një strukturë spitalore. Sipas saj, kjo godinë do të shërbejë edhe për t’iu shërbyer atyre pacientëve që nuk janë në gjendje të rëndë.
Manastirliu tha se po bëhen të gjitha vlerësimet, për të pasur një strukturë tjetër për të prekurit nga koronvirusi, nëse situata përkeqësohet.
“Kemi bërë sot një investigim në vendin ku mendojmë dhe besojmë të jetë ky objekt i cili do t’i nënshtrohet edhe një rehabilitimi dhe më pas edhe një plotësimi të nevojave bazë, me mobilimin spitalor dhe me aparaturat bazike që ne vlerësojmë për të pasur së afërmi dhe për të përballuar fluksin për ata pacientë që nuk do të jenë në gjendje të rëndë”, tha ajo.
