Prania e këngëtarit Goran Bregoviç në festivalin e famshëm të birrës në Korçë, shkaktoi shumë pakënaqësi tek shqiptarët. Duke qenë se mendohet se Bregovic ka nxitur me këngët e tij masakrat e serbëve kundër shqiptarëve të Kosovës, shumë qytetarë dhe artistë kanë kërkuar që të anulohet koncerti. Të shumtë kanë qenë artistët të cilët anuluan pjesëmarrjen e tyre.
Bashkia e Korçës është vënë në qendër të kritikave, për shkak se ka ftuar këngëtarin boshnjak, Goran Bregoviç, në festën e birrës. Në rrjetet sociale janë shtuar thirrjet për anulimin e ftesës për Bregovic, pasi e quajnë atë “këngëtar të ultra nacionalizmit serb”.
Ndonëse rrjeti vlon nga reagimet kundër kësaj performance, Bashkia e Korçës nuk është tërhequr nga vendimi i saj.
Ka qenë nënkryetarja e Bashkisë së Korçës, Bunila Themeli, e cila ka folur për artistët të cilët u tërhoqën nga pjesëmarrja.
“Artistë nga Kosova janë tërhequr nga pjesëmarrja e tyre. Kishim Dafina Zeqirin, Capital T, grupin “NA”, por që u tërhoqën. Edhe Dren Abazi, por ai për arsyet e tij personale”, tha nënkryetarja e Bashkisë Korçë për “Bota sot”.
Këngëtari Shemsi Krasniqi nga grupi “Ilirët” do të jetë artisti i vetëm nga Kosova që do të performojë në Korçë.
“Kemi Shemin nga “Ilirët”, pasi ai është i vetmi nga Kosova i cili do të performojë në festën e birrës, do të thotë vetëm këta emra kishim nga Kosova, por që vetëm Shemi ka pranuar. Ndërsa do ketë një bandë nga Brazili, një Greke si dhe emra të tjerë shqiptarë”, përfundoi Bunila Themeli.
Festa e birrës në Korçë do të mbahet në datat 18-22 gusht.
