Prej disa ditësh, Shqipëria ka filluar vaksinimin masiv të popullsisë kundër koronavirusit, çka ka sjellë edhe ulje të numrit të të infektuarve dhe viktimave.
Kreu i Urgjencës Kombëtare Skënder Brataj deklaroi se deri në fund të majit do të bëhen 500 mijë vaksina dhe situata do të vijë drejt përmirësimit gjatë muajve të verës.
I ftuar në ”Ora News”, Brataj u shpreh optimist se deri në fund të vitit do t’i rikthehemi normalitetit.
Skënder Brataj: “Vaksinimi garanton dritën jeshile në fund të tunelit. Numrat kanë rënë, edhe i të infektuarve edhe i viktimave. 222 mijë vaksinime janë bërë deri më tani. Zotimi i mbylljes së 500 mijë vaksinat brenda majit është real, por megjithatë unë nuk jap premtime sepse nuk e di se sa vaksina kemi në dispozicion. Vaksinimi 100% është i suksesshëm dhe askush nuk mund të ketë dyshime. Kthehemi tek EMA dhe FDA, Amerika nuk do të provojë kurrë një vaksinë të asnjë vendi tjetër, pasi fazën e tretë e bëjnë në vendin e tyre.
Mendoj që vera do të jetë shumë më e qetë sepse nëse arrijmë këtë numër vaksinimi, besoj se verën do e kalojmë kollaj. Marrë përgjegjësinë edhe nga ana prefesionale. Fundi i vitit besoj se do na kthejë në jetën normale”.
