Kreu i Urgjencës Kombëtare, Skënder Brataj deklaroi se asnjë lloj i vaksinës anti-covid, nuk garanton një mbrojtje 100% nga infektimi me koronavirus. Deklarata e Bratajt u bë ditën e sotme në një intervistë për Report Tv.
Brataj tha se deri më tani nuk ka një vendim që i detyrojnë bluzat e bardha që të vaksinohen, teksa shtoi se rreth 90% e tyre, tashme e kanë marrë dozën kundër koronavirusit.
Ndër të tjera, Brataj tha se simptomat e variantit Delta ngatërrohen me gripin sezonal, dhe sipas tij, trajtimi i këtij mutacioni kalon në forma të lehta.
Skënder Brataj: ”Asnjë vaksinë nuk të premton 100% se nuk do infektohesh. Por ka një përqindje të vogël mundësia për tu infektuar. Nuk ka një të dhënë të saktë për bluzat e bardha, në çfarë pike jemi, por di që mbi 90% në bluzat e bardha janë vaksinuar. Nuk ka një statistikë të saktë për të thënë se kaq personel shëndetësor është vaksinuar. Në këtë moment ska vendim që të bëhet me detyrim vaksinimi te bluzat e bardha. Si shenja më tipike është dhimbja e fytit, rrufa, ngatërrohet me viruset e stinës e gripin. Dhe shumë njerëz mendojnë se e kanë nga kondicioneri. Dhe ja hedhin fajin kondicionerit. Nuk janë vënë humbja e shijes dhe nuhajtes, nuk është e përjashtuar por deri më tani nuk janë vënë re. Pothuajse edhe zgjatja e sëmundjes si ditë kalon me forma më të lehta dhe për këtë njerëzit e kanë cilësuar si rrufë të momentit. Me COVID janë rreth 9 pacientë në mos gaboj, pjesa më e madhe e tyre janë të pavaksinuar”.
