Deputeti i mazhorancës Spartak Braho, u është përgjigjur akuzave të presidentit Meta, i cili akuzon qeverinë për grusht shteti ndaj Kushtetutës. Duke folur në Komisionin e Sigurisë ku po diskutohej për aktin normativ “anti-KÇK”, Braho i konsideroi këto akuza mjaft qesharake.
“Është absurde, si mundet që Edi Rama të bëjë grusht shteti kundër vetes së tij. Opozita i organizon grushtet e shtetit. Mazhoranca e ka pushtetin, pse do bëjë grusht shteti! Kështu kjo është jo vetëm qesharake, por është një lloj justifikimi. Unë jam deputet i vjetër, kam qenë prezent kur Sali Berisha ka tentuar dy herë të bëjë grusht shteti. Edhe njëherë po ju them, nuk e bën grusht shteti mazhoranca, sepse ajo e ka pushtetin. Kaq e thjeshtë është logjika”.
Dy ditë më parë, në konferencën e jashtëzakonshme për mediat, Kreu i Shtetit përsëriti qëndrimin e tij se qeveria po tenton që të bëjë grusht shteti. Ai theksoi se po tentohet kontrolli mafioz, për të pasur në dorë Gjykatën Kushtetuese.
“Republika po përjeton gjendjen e rëndë të kapjes së shtetit. Unë konfirmoj se do të marr pjesë në seancën plenare të komisionit të Venecias, ku do t’i njoh të gjithë të pranishmit me fakte dhe më të rënda të përpjekjes për të realizuar një grusht shteti në këtë vend. Rilindja është teatri dhe estrada nr. 1 e këtij shteti dhe e këtij populli”, tha ndër të tjera Meta.
