Është mbledhur mëngjesin e sotëm mbledhja e shtatë e jashtëzakonshme e qeverisë, në lidhje me situatën e krijuar pas tërmetit të 26 nëntorit.
Në mungesë të kryeministrit Rama, i cili ndodhet në Londër, mbledhja u drejtua nga zv.kryeministri Erion Braçe.
Gjatë fjalës së tij në mbledhje, Braçe i bëri thirrje kabinetit qeveritar se e gjithë vëmendja tashmë duhet të përqendrohet te zonat rurale. Kjo sipas tij për shkak të motit dhe nisjes së dëborës, duke shtuar se duhet bërë me urgjencë zëvendësimi i çadrave aktuale me çadra dimërore.
Rama niset në Londër, lë video-mesazh për banorët e prekur nga tërmeti
Braçe e vuri gjithashtu theksin te strehimi i njerëzve nga hotelet në shtëpi me qera.
“Gjithë vëmendja duhet të përqendrohet te zonat rurale apo periferitë, ku njerëzit kanë preferuar të qëndrojnë pranë zonave të tyre. Duhet të bëhet zëvendësimi i çadrave menjëherë, që të jenë çadra dimërore. Duhet të përshpejtojmë gjetjen e banesave me qira. Kruja, Vora, e kanë të pamundur të gjejnë vetë banesa me qira, do duhet t’i akomodojmë ne në Tiranë. Duhet të bëjmë zhvendosjen brenda këtij muaji dhe strehimin e këtyre personave nga hotelet në shtëpi me qira.
Do duhet të mbyllim procesin, Laçi dhe Lezha duhen kthyer në prioritet, për shkak të panikut të përhapur atje, por edhe për shkak të faktit se duhet të nisim programin se ç’do bëhet me ata njerëz”, tha ai.
Kujtojmë se kryeministri Rama u nis ditën e djeshme në Londër, për të marë pjesë në Samitin e NATO-s.
