Kryeministri britanik, Boris Johnson, është futur sërish në izolim pasi ka rënë në kontakt me dikë të infektuar me COVID-19, tha një zëdhënës i Downing Street të dielën në mbrëmje. Zëdhënësi i Downing Street shtoi se Johnson do të vazhdojë të punojë nga Downing Street, duke përfshirë udhëheqjen e përgjigjes së qeverisë ndaj pandemisë së koronavirusit.
Johnson tha në Twitter të hënën në mëngjes se ai është mirë me shëndet dhe nuk ka simptoma. Në një video shoqëruese, ai shtoi se “lajmi i mirë është se NHS Test&Tracing po funksionon gjithnjë e më me efektshmëri.”
Ai theksoi se “nuk ka rëndësi” që ai ndihet “i shkëlqyeshëm”, dhe se ai e ka pasur sëmundjen kështu që “i ka tashmë në organizëm antitrupat”, pasi ai ende ka nevojë të vet-izolohej.
“Ne duhet të ndërpresim përhapjen e sëmundjes dhe një nga mënyrat se si mund ta bëjmë atë tani është duke u izoluar për 14 ditë kur të kontaktoheni nga NHS Test&Tracing dhe unë po e bëj këtë me një zemër të lartë, plot me optimizëm dhe besim“, tha kryeministri.
Johnson u takua me një grup të vogël ligjvënësish për rreth gjysmë ore të enjten, duke përfshirë edhe dikë që më pas zhvilloi simptoma të koronavirusit dhe doli pozitiv.
Zyrtarët thanë se ata do të diskutojnë me autoritetet parlamentare se si Johnson mund të marrë pjesë në distancë në biznesin e Parlamentit.
Britania e Madhe është vendi më i prekur i Europës me gati 52.000 vdekje të konfirmuara nga COVID-19 dhe më shumë se 1.3 milion infeksione./ SCAN
