Prej datës 25 dhjetor ka nisur shpërndarja e bonusit për pensionistët. Me anë të një mjeti identifikimi, të gjithë përfituesit mund të tërheqin 3 mijë lekëshin në çdo pikë të Postës Shqiptare.
Zyrat postare do të qëndrojnë të hapura deri në datën 31 dhjetor, duke i dhënë mundësinë çdo pensionisti të tërheqë shpërblimin e qeverisë.
Instituti i Sigurime Shoqërore ka dhënë më tepër detaje edhe për ata pensionistë të cilët nuk mund ta tërheqin bonusin brenda këtij viti. Pensionistët nuk e humbasin shpërblimin e dhuruar nga qeveria.
Ata do të kenë mundësi ta tërheqin edhe në muajt e parë të vitit 2020. Kjo do të thotë se vendimi për shpërblimin prej 3 mijë lekësh të reja, është në fuqi edhe pas përfundimit të këtij viti. Nga ky vendim përfitojnë 663.227 pensionistë, nga të cilët 530.364 qytetarë që trajtohen me pension pleqërie, 67.754 që trajtohen me pension invaliditeti, 49.849 janë në pension familjar dhe 13.260 që trajtohen me pension social të veçantë.
