Pas protestës së një dite më parë në Librazhd, kundër vizitës së Ramës, sot policia ka vënë në pranga 7 persona, e ndërsa 23 të tjerë janë proceduar penalisht. Sipas policisë, në pranga kanë rënë edhe tre përfaqësues të Partisë Demokratike, mes tyre edhe një ish-deputet.
Arrestimi dhe procedimi i këtyre personave u bë pasi kanë tentuar që të bllokojnë rrugën nacionale Elbasan-Librazhd, duke penguar eskortën e kryeministrit, dhe kanë goditur eskortën me sende të forta e lëndë plasëse piroteknike.
Me thirrjet “Rama ik”, qytetarët janë përplasur edhe me policinë, e cila ishte vendosur para turmës së protestuesve në mënyrë që këta të fundit të mos cënonin eskortën e kryeministrit.
Njoftimi i policisë:
23 të proceduar, ndër ta 7 të arrestuar për protestën e paligjshme të organizuar pasditen e datës 13 qershor në hyrje të qytetit të Librazhdit.
Policia e Librazhdit bazuar në pamjet filmike, dhe raportet e shërbimit, ka bërë arrestimin në flagrancë të 7 personave, për veprat penale të “Organizimit, pjesëmarrjes në grumbullime, manifestime të paligjshme”, dhe “Pengimi i qarkullimit të mjeteve të transportit’’, “Pengim i subjekteve zgjedhore”, konkretisht:
– B.V., 48 vjeç, (Kryetari i Degës së PD-së Librazhd);
– A.B., 53 vjeç, nga Elbasani (ish deputet i PD);
– A.K., 43 vjeç, nga Përrenjasi;
– E.G., 32 vjeç, nga Librazhdi (sekretari i PD-së, dega Librazhd);
– D.B., 47 vjeç, nga Shtërmeni, Cërrik;
– L.O., 31 vjeç, nga Piskashi;
– B.K., 54 vjeç, nga Librazhdi.
Po kështu ka filluar procedimi penal në gjendje të lirë, për të njëjtat vepra penale edhe për 16 shtetas të tjerë.
Arrestimi dhe procedimi i këtyre personave u bë pasi në datën 13.06.2019, rreth orës 18:00, këta shtetas janë grumbulluar në rrugën nacionale në hyrje të qytetit të Librazhdit, tek kryqëzimi i Përrenjasit, dhe në vijim kanë tentuar që të bllokojnë rrugën nacionale Elbasan – Librazhd, në hyrje të qytetit të Librazhdit, duke penguar eskortën e kryeministrit, dhe kanë goditur eskortën me sende të forta e lëndë plasëse piroteknike.
Materialet procedurale u referuan në Prokurorinë pranë Gjykatës së Shkallës së Parë Elbasan.
