Ministri i Brendshëm Fatmir Xhafaj ka përgëzuar Policinë e Shtetit për menaxhimin e situatës në lidhje me bllokimin e rrugëve nga opozita.
Në një postim në rrjetet sociale, ministri Xhafaj evidenton se protesta e opozitës ishte e paligjshme, e megjithatë asnjë incident nuk u shënua falë punës së policisë dhe durimit të qytetarëve.
“Për rreth 2 orë qindra qytetarë mbetën të bllokuar në 4 akse kryesore rrugore, për shkak të protestës së paligjshme të zhvilluar nga opozita. Policia bëri të gjitha përpjekjet për të lehtësuar lëvizjen në rastet e emergjencës.
Falenderojmë qytetarët për durimin e treguar, duke mos shkaktuar asnjë incident, me gjithë vonesën dhe problemet që iu solli ky bllokim. Vlerësim maksimal drejtuesve dhe strukturave vendore të Policisë së Shtetit për menaxhimin profesional të situatës së pazakontë“, thotë ministri Xhafaj.
Opozita protestoi sot për rreth dy orë duke bllokuar rrugët në formë të mosbindjes civile.
