Ministri i Turizmit dhe Mjedisit, Blendi Klosi, ka zbuluar se shqiptarët do të marrin leje në portalin e-Albania për të shkuar në plazh gjatë këtij sezoni veror. Situata nga pandemia ka bllokuar çdo gjë, e shumë pikëpyetje janë ngritur nëse turizmi do të lulëzojë.
Ministri i Turizmit, Blendi Klosi, teksa ishte i ftuar në “Tv T”, foli në lidhje me masat që do të ndërmerren për sezonin e verës. Ai theksoi gjithashtu se midis pushuesve në plazhe do të ruhet një distancë e caktuar, ndërsa festat masive nuk do të lejohen. Bëhet fjalë për një turizëm familjar e të qetë, pa festa në bregdet.
“Po përgatisim një rregullore të re të plazheve, duke i dedikuar një punë të imët, sigurisë së jetës dhe rrezikut të pandemisë.
Do të kërkojë punë dhe detaje. Një draft e kemi, me rregulla të përcaktuara qartë. Me distancë më të madhe nga çadrat e plazhit.
Nuk do të ketë festa masive në bregdet. Do të jetë drejt një turizmi familjar, të qetë, natyrisht duke marrë leje tek e-Albania besoj. Pa leje, do të jetë e vështirë të mendohet sezoni turistik”.
