Me mjaft interes priten ndryshimet e gazetarëve në televizione të ndryshme. Emri i Fevziut ka qenë jo pak i komentuar, ku shpesh herë është përfolur edhe për largim nga televizioni “Klan”, ku ka dhënë një kontribut të madh ndër vite. Po cili është raporti me “Klan”-in dhe a do të ndryshojë ekran? Kjo pyetje tashmë ka marrë një përgjigje. Vetë Blendi Fevziu ka zbuluar se ka patur edhe oferta, por që shtëpia e tij mbetet “Klan”-i.
Fevziu rrëfeu në “ABC e Mëngjesit” se më herët ka marrë një ofertë nga miku i tij, Ben Blushi, për të drejtuar “Top Channel”, por që e refuzoi. Tashmë, ai ka theksuar se e gjen veten vetëm në “TV Klan”.
“Ka qenë një ide e imja që të lëvizja në “Top Channel”, që lidhej me drejtimin e “Top Channel” nga një prej miqve të mi të fëmijërisë dhe të shkollës që ishte Blushi. Por që nuk kam ndërmend të ndryshojë, dhe nuk besoj që të ndryshojë më.
Besoj që e kam lidhur karrierën time me “Klan”-in tani. Unë nuk jam njeri që kam lëvizur shumë, gjithë karrierën time kam ndërruar dy vende pune. Kam gjithmonë bindjen që njeriu investohet në një vend dhe sa më shumë të qendrojë në një vend aq më shumë e krijon raportin”, tha Fevziu.
