Birra e njohur kosovare “Peja”, pas një sërë kritikash të ardhura nga artistë e qytetarë të ndryshëm, ka marrë vendimin për tu tërhequr nga Festivali i Birrës që do të mbahet në Korçë. Kjo lidhet ngushtësisht me pjesëmarrjen e këngëtarit serb Goran Bregovic në këtë festival, për të cilën ka patur shumë pakënaqësi e madje edhe anulim të pjesëmarrjes së artistëve.
Kritikët e akuzojnë Bregovic si frymëzues të masakrave të ushtrisë serbe në Kosovë. Me anë të një deklarate për media, kompania e birrës thotë se në momenin kur janë njoftuar se Festivali i Birrës në Korçë ka ftuar këngëtarin Goran Bregovic të performojë, birra “Peja” është tërhequr nga pjesëmarrja dhe mbështetja e këtij festivali.
“Ne besojmë që Festivali i Birrës duhet të sjellë kënaqësi, duke krijuar atmosferë miqësore mes të gjithëve, andaj dhe jemi të hapur për të mbështetur iniciativat e tjera argëtuese për të zëvendësuar këtë festival”, thuhet më tej në deklaratë.
Artistë të ndryshëm kanë apeluar më herët që festivali i Korçës të anulohet, për shkak të pjesëmarrjes së artistit serb Goran Bregovic që ka nxitur masakrat e serbëve ndaj shqiptarëve të Kosovës. Mirëpo këto thirrje duket se nuk kanë ndikuar aspak tek Bashkia e Korçës, që nuk lëkundet fare në vendimin e saj.
