Situata nga koronavirusi është përkeqësuar me ritme të shpejta në shtetin turk, i cili renditet mes 10 vendeve më të prekura nga COVID-19.
Në 24 orët e fundit në Turqi janë shënuar 115 viktima, duke e çuar në 1,518 numrin total të vdekjeve nga koronavirusi.
Ndërkohë janë regjistruar edhe 4,281 raste të reja, teksa numri total i personave të infektuar ka shkuar në 69,392.
“Numri i përgjithshëm i rasteve të regjistruara me koronavirus u rrit në 69 392, pasi 4 281 persona kanë rezultuar pozitivë në virusin. Deri më tani, gjithsej 5,674 janë shëruar dhe kanë dalë nga spitalet. Turqia aktualisht po kuron 1,820 pacientë në njësitë e kujdesit intensiv”, tha ministri turk i Shëndetësisë, Fahrettin Koca në Twitter.
Më shumë se 62 mijë raste janë ende aktive në shtetin turk. Sipas Worldometer, Turqia renditet e nënta si vendi me numrin më të madh të personave të infektuar, pas SHBA-ve, Italisë, Spanjës, Francës, Gjermanisë, Mbretërisë së Bashkuar, Kinës dhe Iranit.
Më shumë se 2 milionë njerëz nga e gjithë bota janë prekur nga COVID-19, ndërsa më shumë se 133 mijë persona kanë humbur jetën.
Në raport global: 508,629 kanë arritur ta mposhtin koronavirusin, ndërsa mbi 1,4 milionë janë ende raste aktive.
