Koronavirusi ka shënuar tre viktima në 24 orët e fundit në shtetin grek.
Sipas mediave vendase, janë shtuar edhe 17 raste të reja, duke e çuar në 2,224 numrin total të personave të infektuar. Që nga shpërthimi i COVID-19, shteti fqinj ka regjistruar 108 viktima nga virusi vdekjeprurës.
Greqia feston Pashkët ortodokse këtë fundjavë por lëvizja me makina nuk do të lejohet. Ndërsa këmbësorët do të lejohen me autorizime për të bërë pazarin.
Mësohet se ceremonitë kishtare do të zhvillohen live në media me dyer të mbyllura. Duke shmangur kështu grumbullimin e njerëzve në ambientet e kishave. Kjo nuk ka ndodhur kurrë më parë në Greqi.
Deri më tani në vendin fqinj raportohen të jenë shëruar 269 persona të infektuar. Numri i rasteve ende aktive në Greqi është 1,847, teksa 71 prej tyre ndodhen në gjendje kritike për jetën.
Më shumë se 2,2 milionë njerëz nga e gjithë bota janë prekur nga koronavirusi, ndërsa rreth 150 mijë persona kanë humbur jetën.
