Italia ka shënuar një përkeqësim të bilancit nga koronavirusi, në 24 orët e fundit.
Vendi fqinj kishte ditë që nuk e kalonte pragun e 300 viktimave. Ky prag është kaluar brenda 24 orëve të fundit, ku janë shënuar 369 persona të vdekur, 133 më shumë se një ditë më parë.
Një rritje e lehtë shihet edhe në zbulimin e rasteve të reja. Sot janë shënuar 1,444 raste, pothuajse 400 më shumë se ditën e djeshme.
Ndërkohë, brenda këtyre 24 orëve ka pasur një shifër rekord prej më shumë se 8 mijë personash që janë shëruar nga COVID-19.
Që nga shpërthimi i pandemisë, Italia ka regjistruar 214,457 raste infektimi dhe 29,684 viktima. Mbi 91 mijë raste janë akoma aktive në Itali, ndërsa 1,333 persona ndodhen në gjendje të rëndë shëndetësore.
Italia renditet tashmë e dyta në Evropë për numrin më të madh të viktimave, pas Mbretërisë së Bashkuar.
