Indeksi i Çmimeve të Importit në tremujorin e dytë 2019, shënoi ulje me 0,8 % krahasuar me tremujorin e dytë të vitit 2018 dhe ulje me 0,6 % krahasuar me tremujorin e mëparshëm.
Çmimet e importit të produkteve në seksionin “Industria përpunuese”, e cila zë peshën më të madhe në vlerën e importeve, kanë shënuar ulje me 1,2 %. Brenda këtij seksioni ulja më e madhe e çmimeve vërehet në produktet e aktivitetit “Prodhimi i produkteve të duhanit” me 8,0 %, pasuar nga aktivitetet “Prodhimi i tekstileve” me 6,6 %, “Prodhimi i makinerive dhe pajisjeve p,k,t” me 3,5 %, etj.
Nga ana tjetër çmimet në aktivitetin “Përpunimi i koksit dhe rafineria e nënprodukteve të naftës” kanë shënuar rritje me 5,4 %, pasuar nga grupi “Prodhimi i pajisjeve elektrike” me 4,7 %.
Indeksi i Çmimeve të importit në tremujorin e dytë 2019 shënoi ulje me 0,6 %, krahasuar me tremujorin e parë 2019. indeksi në seksionin “Industria përpunuese”, e cila zë peshën më të madhe në vlerën e importeve, ka shënuar ulje me 0,2 %.
Indeksi i çmimeve të importit mat ecurinë e çmimeve të transaksioneve të produkteve industriale të importuara për tu shitur në tregun vendas.
Dy vitet e fundit çmimet e mallrave të importit në tregun vendas kanë rënë për dy arsye. E para dhe më e rëndësishmja lidhet me mbiçmimin e monedhës vendase lekut ndaj euros. Shqipëria është importues netos i mallrave të konsumit, ndaj dhe rënia e euros i ka bërë më të lira mallrat e importit në tregun vendas.
Arsyeja tjetër lidhjet me koniunkturën e çmimeve në tregjet ndërkombëtare. Ulja e çmimeve për artikuj të tillë si cigaret dhe veshjet reflektohen edhe në tregun vendas.
Çmimet e importit janë një përbërës i rëndësishëm i inflacionit në vend./Monitor
