Të dhënat më të fundit nga “Instituti i Statistikave” kanë faktuar se gjatë muajit mars kanë ndodhur më pak aksidente. Po kështu ka rënë edhe numri i të aksidentuarve, por të rinjtë vijojnë të jenë më të papërgjegjshmit në timon.
Gjatë muajit të kaluar, numërohen 101 aksidente rrugore nga 119 aksidente të ndodhura në muajin mars 2021, duke u ulur kështu me 15,1 %. Rënie e këtij treguesi regjistrohet gjithashtu edhe gjatë tremujorit të parë të këtij viti, krahasuar me tre mujorin e parë të vitit 2021. Tre muajt e parë të këtij viti kanë rezultuar me rënie në numrit të aksidenteve rrugore.
“Në tremujorin e parë të vitit 2022 numërohen 285 aksidente rrugore nga 323 aksidente, të ndodhura në të njëjtën periudhë të një viti më parë, duke u ulur me 11,8%. Në muajin mars 2022, numri i të aksidentuarve (të vrarë dhe të plagosur) është 145 persona nga 150 që ishte në të njëjtën muaj të një viti më parë.
Në tremujorin e parë të vitit 2022, numri i të aksidentuarve është 392 persona nga 418 persona të aksidentuar në të njëjtën periudhë të një viti më parë. Në muajin mars 2022, numri i të vdekurve nga aksidentet rrugore është 14 persona, nga 18 persona të vdekur në mars 2021. Në tremujorin e parë të vitit 2022, numri i të vdekurve nga aksidentet rrugore është 46 persona nga 58 persona të vdekur në tremujorin e parë të vitit 2021″, thuhet në publikimin e INSTAT.
Ulja e numrit të aksidenteve vjen si pasojë e sjelljes së këmbësorëve. Grupmosha 25-34 vjeç kanë shkaktuar numrin më të lartë të aksidenteve.
“Në muajin mars 2022, aksidentet rrugore, në 93,1% të rasteve, kanë ndodhur si pasojë e sjelljes së drejtuesit të mjetit. Numri më i lartë i aksidenteve në këtë periudhë është kryer nga grup-mosha 25- 34 vjeç, duke zënë 29,7% të numrit të aksidenteve gjithsej.
Aksidentet në këtë grup-moshë janë ulur me 3,2%, krahasuar me të njëjtën periudhë të një viti më parë. Në tremujorin e parë të vitit 2022, aksidentet rrugore, në 12,6% të rasteve, kanë ndodhur si pasojë e sjelljes së këmbësorit. Gjatë kësaj periudhe, numri i aksidenteve sipas sjelljes së këmbësorit është ulur me 43,8%, krahasuar me të njëjtën periudhë të një viti më parë”, vlerëson INSTAT.
