Mes qeverisë së Kosovës dhe asaj serbe ka një tjetër “betejë”. Shkak është bërë kompania gjermane “Volkswagen”. Është qeveria e Kosovës ajo që i ka propozuar kësaj kompanie që të investojë në vend, duke hapur një fabrikë për prodhimin e makinave.
Sipas mediave fqinje, ministri kosovar i Tregtisë dhe Industrisë, Endrit Shala i ka dërguar menaxherit të lartë të “Volkswagen” një letër ku nënvizon përparësitë tatimore dhe përfitimet e shumta që ofron Kosova për investimet e huaja, përveç faktit se ka një pozicion gjeografik strategjik në rajon.
Nga ana tjetër, sipas shtypit serb, grupi gjerman synon të hapë një fabrikë të re në një nga vendet e Evropës Juglindore dhe presidenti Aleksandar Vuçiç tha se shpresonte që investimi mbi 1 miliard euro të bëhej në Serbi.
Sipas Vuçiç, Serbia ofron shkallë të lartë stabiliteti. Por, në “lojë” për investimin në fjalë janë edhe Bullgaria, Rumania dhe Turqia.
Vuçiç, në kuadër të propagandës që po bën Serbia për të përfituar këtë investim, ka reklamuar në televizionet serbe një orë të markës “Volkswagen”, e dhuruar nga një ministri serb i Financave. Gjatë intervistës televizive, ai theksoi se Beogradi po lufton për të tërhequr gjigantin gjerman të automobilave.
Gjatë një vizite njëditore në Gjermani, Vuçiç vizitoi edhe muzeun e kompanisë “Volkswagen” në Volfsburg, ku edhe shpërndau disa fotografi.
