Ish-kryeministri Sali Berisha deklaroi sonte se Xhafaj mbajti ligjin e kazinove të bllokuar 8 muaj për llogari të të vëllait .
I ftuar sonte në emisionin “Mbrëmja ABC” në “ABC News”, Berisha deklaroi se shqiptarët e panë sesa u ulën taksat për pronarët e lojërave të fatit 4- 5 muaj më parë.
Lideri historik i PD-së theksoi se kryeministri Rama e ka shndërruar Shqipërinë në vendin e bixhozit. Sipas tij, Shqipërinë do ta hanë bastet në një kohë të shkurtër.
“Së pari beteja e tij me bastet është aq serioze sa ç’është beteja e tij me drogën. Pasi e shndërroi Shqipërinë në Kanabistan e Kolumbi të drogës bëri be se do luftonte drogën, jo vetëm që nuk e luftoi po droga po e rrënon këtë vend.
Preferoj ta quaj Industria e mëkatit. Ky erdhi me zotimin se do i shkatërojë, filloi betejën, mori llokmat gjatë betejës dhe nga 910 pika që ishin në 2013 sot janë 4100 pika të regjistruara dhe shqiptarët e kanë të qartë sesi Xhafaj për llogari të Geronit mbajti ligjin e lojërave të fatit 8 muaj në parlament. Shqiptarët e panë sesa u ulën taksat për pronarët e lojërave të fatit 4- 5 muaj më parë. 4 mijë pikët e basteve janë punësimi nr 1. Shqipëria u shndërrua në vendin e bixhozit”.
Për Berishën, loja e bixhozit me celular po shkatërron shqiptarët, duke bërë që Shqipërinë ta hanë bastet në një kohë të shkurtër.
“Loja e bixhozit me celular pra ky po shkatërron nëse do fillonte me 1 mije lekë tani fillon me 200 euro dhe Shqipërinë do ta hanë bastet në një kohë të shkurtër. Ai do e zhvendosë këtë biznes në telefonat inteligjentë”.
Me këtë mënyrë sipas Berishës, Rama po e monopolizon në duart e vëllait të vet dhe Partisë Socialiste.
“Po krijon dhe monopolizon në duart e të vëllait të vet, Gjushit, Gazmend Hoxha, do i them Gaz Rama dhe kanë gjet ca emra turq, qipriot .
Atij i kanë dërguar me qindra mesazhe, se po i mërr si familje lojërat e fatit. Unë kam qenë për politikë kufizuese. Unë nuk jam i ekstremeve, por për politikë kufizuese, ndërsa këta morrën politika nxitëse e kthyen në një epidemi. Lojërat e fatit i merr familja Rama dhe Partia Socialiste e tij”.
