Ish-kryeministri Sali Berisha ka komentuar fushatën e vaksinimit kundër koronavirusit në vend, i nisur me shumë bujë nga kryeministri Edi Rama.
Duke krahasuar procesin e vaksinimit me Turqinë, Berisha shprehet se me këtë ritëm, Ramës do t’i duhen gati 200 ditë për të vaksinuar vetëm personelin shëndetësor.
Sipas tij, Rama i solli vaksinat në mënyrë kontabandë.
“Këtij i thonë sukses! Turqia, 300 000 të vaksinuar në ditë, Shqipëria 365 të vaksinuar në 5 ditë! Dje Edvin Hajduti njoftoi se nga vaksina skarcitet kallp e futur në mënyrë klandestine në Shqipëri, janë vaksinuar 350 persona.
Agjensia Reuters njofton dje se Turqia ka vaksinuar në dy ditët e para mbi 600.000 njerëz. Kështu, Shqipërisë me Edvin Hajdutin për të vaksinuar vetëm personelin mjekësor do t’i nevojiten 200 ditë. S’ka gjë se vet e bëri i pari vaksinën!”, shkruan Berisha në rrjetin social, Facebook.
