Kreu i PD-së Sali Berisha, në një deklaratë për mediat nga selia blu, ka reaguar për ndryshimet në qeveri. Arben Ahmetaj nuk do të jetë më zv. kryeministër, ndërsa vendin e tij e mori Belinda Balluku. Kryeministri Rama shkarkoi nga detyra Arben Ahmetajt, si zv.kryeministër dhe ministër i Shtetit për Rindërtimin, dhe në vend të tij ka emëruar Ballukun, si zv.kryeministre. Kryetari i Partisë Demokratike, Sali Berisha tha se Ahmetaj u shkarkua për aferën e inceneratorëve, duke shtuar se abuzuesi numër një është kryeministri Edi Rama.
“Sot njoftohet se Edi Rama për të larë duart me krimin e tij të shëmtuar, aferën ndër më të mëdha në historinë e vendit, ata të djegëseve, ka shkarkuar nga detyra Arben Ahmetaj. Me këtë rast unë duke e konsideruar Ahmetajn një nga eksponentët kryesor të mafies së djegësve, shtoj se kreu i kësaj afere është një dhe vetëm një, dhe ky është Edi Rama.
Në aferën e inceneratorëve ka firmosur siç ka pohuar vetë, në kundërshtim me ligjin. Rama ka firmosur në mënyrën më të paligjshme kontratën bazuar ne procedurën antiligjore të negociatave të mbyllura. Edi Rama në shkelje flagrante të ligjit dhe barazisë së tenderave, ka firmosur kontratën e një kompanie që kishte zero eksperiencë në fushën e plehrave. Rama është përgjegjësi numër një i vjedhjes monstruoze të shqiptarëve në aferën e djegëseve”, tha Berisha.
Sipas Berishës, për ndërtimin e inceneratorëve të Elbasanit dhe Fierit, Ministria e Mjedisit nuk kishte para. Por Rama ka përdorur Fondin e Këshillit të Ministrave, për t’i kaluar dhjetra milionë euro kësaj Ministrie.
“Edi Rama ka firmosur në mënyrën më të paligjshme, kontratën bazuar në procedurën antiligjore të negociatave të mbyllura. Edi Rama, në shkelje flagrante të ligjit dhe barazisë së tenderave, ka firmosur kontratën e një kompanie e cila kishte zero eksperiencë në fushën e plehrave. Edi Rama është përgjegjësi numër një i vjedhjes mostruoze të shqiptarëve në aferën e djegësave.
Për djegësin e Elbasanit dhe të Fierit, Ministria e Mjedisit që u përdor për ekzekutimin e kësaj vjedhje, kishte në buxhetin e saj zero lekë. Paratë e djegësave, u morën nga Fondi i Këshillit të Ministrave për urgjencën. Fond që në përputhje me ligjin e vendit, përdoret vetëm për fatkeqësi natyrore dhe gjendje urgjente. Edi Rama, këtë fond e përdori për të përvetësuar, bashkë me zyrtarët e tij, dhjetra e dhjetra milionë euro. Me urdhër të tij, ai nga fondi i emergjencës së Këshillit të Ministrave, kaloi dhjetra milionë euro në buxhetin e Ministrisë së Mjedisit për vjedhjen me inceneratorët.
Edi Rama është përgjegjës direkt, sepse ai firmosi kontratën me procedurë të mbyllur në një kohë kur enti zyrtar i Prokurimeve Publike, ajo që quhet APP, me shkresë kishte denoncuar më përpara si të paligjshme për prokurim, negociatat e mbyllura. Kurrë një kryeministër, përveçse atij që vendos të vjedhë para me valixhe, nuk mund të firmoste në një procedurë të tillë. Edi Rama, është koka e kësaj afere të tmerrshme”, u shpreh Berisha.
