Ish-kryeministri Sali Berisha ka dhënë porositë e protestës më datë 6 dhjetor. Ai ka udhëzuar protestuesit që të hapin dyert demokratëve në Tiranë më datë 5 dhjetor, në mënyrë që të nesërmen të protestojnë. Pavarësisht refuzimit të autoriteteve, Sali Berisha nuk tërhiqet nga vendimi për ta zhvilluar protestën para Kryeministrisë.
Duke marrë shkasë nga bllokimi i rrugëve dhe masave të rrepta për samitin e liderëve evropianë, Berisha u ka dhënë porositë e radhës banorëve të njësisë numër 5, se si duhet të veprojnë protestuesit. Ish-kryeministri u shpreh se nëse bllokohen rrugët më datë 6, të gjithë protestuesit që do të vijnë nga qytetet e tjera të Shqipërisë, të vijnë më datën 5 dhjetor dhe të strehohen në Tiranë.
“Meqë ky është i tmerruar (Rama), mund të bëjë dhe bllokime rrugësh dhe mijëra demokratë mund të kenë vështirësi për të kaluar rrugën. Prandaj të hapim dyert e shtëpive më datë 5 dhjetor të gjithë miqve tanë për t’i strehuar për protestën”.
