Duke folur dje në një takim me intelektualët në Vlorë, ish kryeministri Sali Berisha është ndalur tek turizmi, që sipas tij, ka falimentuar. Ai ka shpërthyer dje në akuza të forta në adresë të kryeministrit Edi Rama. Duke bërë një krahasim me Greqinë e Turqinë, Berisha pohoi se kapacitetet tona nga bizneset shfrytëzohen dy ditë në javë. Sipas tij, kjo pasuri po shndërrohet në një mallkim për shqiptarët. Duke bërë një bilanc të situatës, ai shprehet se biznesmenët po përballen me falimentin, kjo si pasojë e politikave të qeverisë.
“Sektori i turizmit po falimenton. Arrijmë në përfundimin shumë të hidhur se edhe kjo pasuri e pakrahasueshme, mahnitëse kombëtare, po shndërrohet në një mallkim për shqiptarët. Sot, ky vit është me kapacitete të boshatisura si asnjëherë më parë. Ata që investuan mundin dhe djersën e tyre në kapacitete turistike, këtë vit, shumë prej tyre mendojnë si t’i shesin, si të shpëtojnë nga falimentimi dhe barra e tyre.
Nuk ka një sektor tjetër ekonomik që është tmerrësisht i rëndësishëm. Punëson mbi çerek milionë qytetarë me anekse dhe të tjera është gjenerator kryesor, por ja ku jemi. Kapacitetet në korrik ishin as gjysmë për gjysmë të shfrytëzuara. Kapacitetet shfrytëzoheshin kryesisht në ëeekend. Por krahaso ti një investitor në Vlorë, apo në Durrës që të shfrytëzojë kapacitetet e tij dy ditë në javë, në një kohë kur homologu i tij në Greqi apo Turqi i shfrytëzon 5-6 muaj”, tha Berisha.
