Berisha duket se ia ka marrë dorën rrjeteve sociale. Atë tashmë do e gjejmë edhe në Tik Tok, e për këtë veprim ai shprehet se ndër pasionet e tij mbetet teknologjia. Një etapë e re vjen për ish-kryeministrin Berisha, i cili duhet se do të sfidojë hapur kundërshtarët e tij. Kreu i PD-së e ka startuar me një videomesazh për të gjithë të rinjtë, duke i ftuar për të bashkuar forcat për të shpëtuar Shqipërinë nga rreziku që vjen si pasojë qeverisjes së Edi Ramës. Ai shprehet se sfida më e madhe është largimi i kësaj qeverie, e cila sipas tij, largon njerëzit nga vendi.
“Një përshëndetje nga kanali im Tik Tok. Jam entuziast se sot filloj një dialog nëpërmjet këtij kanali që njeh përparim të shpejtë. Ka qenë një pasion dhe mbetet i imi teknologjia.
Sot ne jemi në prag të një revolucioni të paparë të internetit. Sot të rinjtë shqiptarë shkëlqejnë në kompani të mëdha. Kurse këtu, ai tjetri thotë punë ka, por profesionistë nuk ka.
E vërteta është tjetër. Këtu profesionistë ka, por lidership nuk ka. Ndaj dhe PD-ja do përcaktojë objektivat kryesore të programit të saj, vendosjen të këtyre sektorëve si promotorë apo në zemër të ekonomisë shqiptarë, me besimin e madh se ju të rinjtë e vendit do ta çoni para këtë revolucion dhe mendjen dhe energjitë tuaja mund të shndërroni Shqipërinë në një “Silicon Valley” të Evropës dekadës që vjen.
Për realizimin e kësaj, ne kemi një sfidë dhe kjo është largimi i kësaj qeverie, e cila në vend të krijojë kushtet për ju, preferon t’ju përzejë nga vendi juaj. Ushqen popullatën me një propagandë që ju kurrë nuk e besoni.
Ndaj ju ftoj të bashkojmë forcat tona për të shpëtuar Shqipërinë nga ky rrezik i madh, dhe për të krijuar këtu në Shqipëri të gjitha mundësinë që ju të ndryshoni kombin dhe vendi juaj”, shprehet Sali Berisha.
