Pas shpalljes së koalicionit të Sali Berishës dhe Lëvizjes Socialiste për Integrim për zgjedhjet e 6 marsit, një reagim i menjëhershëm ka ardhur nga PD-ja.
Në një reagim zyrtar, PD-ja shprehet se ky koalicion “non-grata” nuk do të mbajë Shqipërinë në vendnumëro. “Sali Berisha ka vetëm një garë, atë për të dëmtuar Partinë Demokratike. Koalicioni “non grata”, nuk do ta mbajë Shqipërinë në vendnumëro, hallet e Berishës, Ramës dhe Metës, nuk janë hallet e shqiptarëve. Zgjedh Ramën, mban Berishën dhe Metën. Zgjedh Berishën dhe Metën, mban Ramën”, thuhet në reagimin e PD-së.
Ish-kryeministri Berisha, në prezantimin e 6 kandidatëve për kryetar Bashkie, shpalli koalicionin me LSI-në, duke e cilësuar si “Shtëpia e Lirisë”. Ndërsa bëri të ditur se pjesë e kësaj lëvizje do të jenë edhe partite te tjera. Në konferencën e kësaj të hëne, ku janë prezantuar kandidatët për kryetar Bashkie në zgjedhjet e 6 marsit, ish-kryeministri Sali Berisha ka konfirmuar se është në koalicion me Lëvizjen Socialiste për Integrim. Lideri historik i demokratëve tha se kandidatët e zgjedhur dje, do të garojnë në një koalicion me LSI-në, por edhe me parti të tjera që do të jenë pjesë. “Pa diskutim LSI do të jetë. LSI është pjesë e këtij koalicioni dhe po shikohen modalitetet që përcakton ligji. Jemi në negociata edhe me parti të tjera. Koalicioni do të quhet “Shtëpia e Lirisë”, tha ai.
