Ish-kryeministri Sali Berisha i është rikthyer profesionit të tij të parë; atij të mjekut. Ashtu si zakonisht, edhe këtë herë objekt të analizave dhe akuzave të tij ka kryeministrin Edi Rama, por duke e trajtuar si pacient.
Përmes një postimi në profilin e tij në Facebook, Berisha akuzon kryeministrin Rama se e shndërroi Shqipërinë në një narko-shtet. Ndërsa thekson se Rama është i varur nga droga dhe sindromi i fetishit të atleteve. Me këto të fundit, sipas Berishës, Rama ka përdhosur imazhin e vendit, duke shkaktuar skandale të njëpasnjëshme si ai i fundit, në Samitin e Kartës së Adriatikut në Malin e Zi.
“Edi Rama, piktori dështak, mbylli mandatin e parë duke u bërë vërtet i famshëm por realisht famëzi për Narko-shtetin që ndërtoi këto vite në Shqipëri duke merituar universalisht etiketimin e tij nga mediat më serioze të botës si “Noriega i Europës”. E vërteta është se për Ramën, përdorues dhe addict droge, kjo e fundit nuk është dhe nuk mund të jetë krim por super vlerë. Me të drejtë mund të lind pyetja se pse Rama e bën veten lolo me atletet e tij në samitet ndërkombëtare? E vërteta është se Rama, i ngërthyer nga sindromi i fetishit te atleteve, është bërë addict (i varur) ndaj tyre”, shkruan Berisha në profilin e tij në Facebook.
