Berisha nxjerr emrat e socialistëve që u punojnë të afërmit në Albcontrol

Ish-kryeministri Sali Berisha, ka mohuar akuzat se qëndron pas protestës së kontrollorëve në aeroportin e Rinasit, të cilën kreu i qeverisë Edi Rama e konsideroi tentativë për “grusht shteti”.

Në një intervistë për RTV Ora, Berisha u shpreh se është një fatkeqësi që ama përdor fjalë vulgare lidhur me këtë çështje.

Ndër të tjera, Berisha përmendi dhe emrat e disa deputetëve socialistë, sipas të cilit kanë të afërm që punojnë në Albcontrol.

Sali Berisha: ”Më lejo t’ja kthej pak siç e meriton sepse ai njeri me atë që nuk thuhet, rri,  e ka në gojë nga mëngjesi në darkë dhe në Parlament kur nuk i mjaftonte i veti merrte dhe të familjes së tij. Është një turp dhe faqe e zezë njeri që i lejon vetes të përdorë fjalët më vulgare dhe banale po degradon dhe denatyrohet gjithnjë e më shumë si njeri. Akuza reale për “grusht shteti” ai ka ndaj Fatmir Xhafës, Paulin Sterkaj dhe një seri socialistësh të tjerë njerëzit më të afërt të të cilëve janë sistemuar në pozicione kryesore në Albcontrol. Nuk mund të them gjë tjetër, ai i rrjedhur mund të flasë në këtë mënyrë por të themi se nuk është i rrjedhur, është një njeri i cili i kompleksuar nga disfata e tmerrshme që e pret nuk di se çfarë flet.”