Gjatë një konference për mediat në Shkodër, ish-kryeministri Sali Berisha paralajmëroi Edi Ramën që të mos cënojë zgjedhjet e 6 marsit, pasi do të përballet me revolta të mëdha. Berisha tha se i konsiderojnë këto zgjedhje, stad i revolucionit paqësor demokratik.
“Së pari, ne jemi pjesë e procesit zgjedhor. Do ta ndjekim me interes maksimal. Siç e shikoni, bëjmë një fushatë intensive në respekt të qytetarëve, të zgjedhësve dhe në rast se Edi Rama dhunon zgjedhjet do të përballet edhe më shumë me revolucionin tonë paqësor demokratik.
Ne i konsiderojmë këto zgjedhje, stad i revolucionit paqësor demokratik. Nuk kam kundërshtuar kurrë dhe s’do të kundërshtoj kurrë rezultatet që dalin nga vota e lirë. Ka kundërshtuar, por me efiçencë, rezultatet që kanë dalë nga dhunimi i votës dhe në rast se ju kujtohet në vitin 2001, raporti i ODIHR u përmbys për shkak të dokumentacionit të shumë që paraqitën ne dhe e shkroi vetë ODIHR që opozita paraqet dokumente të pakundërshtueshme për ç’ka e ndryshoi raportin”, tha Berisha.
Më 19 shkurt u hap zyrtarisht fushata elektorale për zgjedhjet e pjesshme. Në 6 mars do të zgjidhen kryebashkiakët e Shkodrës, Durrësit, Rrogozhinës, Lushnjes, Vorës dhe Dibrës, teksa tashmë kandidaturat janë bërë publike nga kryetarët e partive.
Në 6 mars do të votohet për kryebashkiakët që do të kenë një mandat vetëm 1-vjeçar. Komisioneri Shtetëror i Zgjedhjeve iu ka bërë apel qytetarëve të ushtrojnë të drejtën e votës dhe partive dhe kandidatëve të bëjnë një fushatë qytetare.
