Ish-kryeministri Berisha ka komentuar deklaratat e Ramës, i cili tha se Shqiperia do presë studentë të huaj në universitetet e vendit. Berisha kërkoi nga Rama të lëvizë mesataren për studentët që duan të hyjnë në universitet, ose të largohet nga qeveria. Ish kryeministri tha në shenjë këmbane alarmi se vendi sot ndodhet në një situatë kritike, e cila kërkon një angazhim të fuqishëm, në procesin e primareve.
Berisha gjatë fjalës së tij para demokratëve u shpreh se PD do të jetë më e hapur dhe më demokratike. Ai theksoi se sot të djathtët janë mbledhur për miratimin e udhëzuesit që ka të bëjë me modalitet e pjesëmarrjes së simpatizantëve në primaret për zgjedhjet e pushtetit vendor 2023, si zgjedhjen e Komisionit të Organizimit dhe kontrolleve elektorale dhe pika e tretë hapja e garës primare për pushtetin vendor në të gjitha degët e PD.
“Ne jemi sot në një situatë kritike, situatë e cila kërkon një angazhim të fuqishëm, në procesin e primareve, por kërkon një përpjekje po kaq të fuqishme për t’ju përgjigjur thirrjeve të qindra mijëra zemrave dhe mendjeve të revoltuara të qytetarëve shqiptarë për organizmin e protestave të fuqishme në mbarë vendin.
Unë kuptoj, e mirëkuptoj të gjithë ata qytetarë që nuk kanë mirëpritur shtytjen e protestave, që mezi presin të fillojnë protesta, që shohin protestën si një domosdoshmëri absolute ndaj një qeverie që nuk njeh ligj, normë, standart, ndaj një qeverie e cila me aktet e veprimet e saj vjedh nga mëngjesi në darkë qytetarët, mashtron, shkelmon mbi të drejtat e tyre dhe de fakto shkelmon mbi interesin kombëtar të shqiptarëve.
Nuk mund të vazhdohet më tutje, një njeri që mashtron në cdo gjë, që kërcënon me arrogancë çdo kërkesë të drejtë. Ju jeni dëshmitarë për qendrimin që ai mban ndaj grevës së sindikatave të universiteteve.
Një injorant që mburret se s’ka master, as doktoratë, ndërpreu me vendim qeverie doktorimin për 8 vite doktorimin e universitetet e vendit, duke harruar se është jetik për veprimtarinë e kerkimit shkencor.
Kalon nga takimi në takim, rreh gjoksin se “unë s’kam as master as doktoratë”, po s’ke, se s’ke mend, je një fatkeqësi kombëtare me injorancën që tregon. E gjithë këtë duf u’a kthen studentëve e pedagogëve.
Nuk mund të dëgjosh kurrë një kryeministër të një vendi që thotë “s’ka rëndësi se s’kam studente vendas se do marr studentë të huaj”, ça është ky more? I ka armiq ata me 5 e 6, nuk e lëviz mesataren, o do lëvizësh mesataren o do ikësh, njërën nga të dyja. Zgjidhe mirë, jemi të gatshëm të derdhemi në rrugë e sheshe në momentin më të parë që ta shohim të domosdoshme.
U thotë të rinjve nuk e ul mesataren se do marr nga Bangladeshi studentë. Nuk mund të konceptohet të kalojë njeriu deri këtu. Ky ka konceptin e etërve të tij që ishin për arsimin selektiv, ua them studentëve kjo është politika që ndiqej në diktaturë, ku biografia kufizonte masivisht hyrjen nnë Universitet. Tani ka gjetur mesataren për të kufizuar hyrjen, ç’ka nuk e bën askush, asnjë vend”.
