Ish-kryeministri Sali Berisha ka hedhur akuza mbi kreun e PD-së, Lulzim Basha, se është përfitues në projektin e lagjes “5 Maji”. Ai tha se kjo është arsyeja përse Basha hesht, teksa e akuzoi këtë të fundit edhe për një projekt ndërtimi në selinë e PD-së. Deklaratat e Berishës erdhën në hyrje të Kuvendit, ku ai u kthye ne sallë pas 4 muajsh mungese.
“Hajnitë, vjedhjet e tyre i kanë zhveshur nga çdo normë njerëzore. Duke thënë këto fjalë, unë personalisht nuk jam kundër zhvillimit të qytetit, por nuk mbështes kurrë barbarinë ndaj qytetarëve të tij. Nëse ti vendos për shkak të planeve për të prishur shtëpitë e të tjerëve dhe mund ta bësh këtë, kjo nuk përjashtohet. Ka një detyrim moral, do ulesh me ta. Do u shpjegosh projektin. Do të përcaktosh kushtet dhe do dëgjosh kushtet që kanë ata. Qoftë zhvillues shtetërorë apo privat, je i detyruar që të veprosh në këtë mënyrë. Përveç kësaj, gjithçka që veprohet, veprohet duke i dhënë ligjit fuqi prapavepruese. Gjer në vitin 2014, ligji parashikonte legalizim, pastaj urbanizim. Këto shtëpi janë ndërtuar para vitit 2014. Këto shtëpi trajtohen në përputhje me këtë ligj, legalizim dhe pastaj urbanizim. Kjo nuk ndodh sepse jo kohezioni social, jo njerëzia, por urrejtja ndaj atyre që i ke vjedhur dhe mbi vjedhjet ndaj tyre ke ndërtuar parajsën dhe lumturinë janë karakteristika të pushtetit kleptokratik. Të gjitha veprimet ndaj këtyre banorëve janë absolutisht të paligjshme”.
