Ish-kryeministri, Sali Berisha ka bërë një postim pak të “çuditshëm” në rrjetin social “Facebook”.
Berisha shkruan, “Ja pse duhet votuar Edi Drama!”. Shumëkush me një pamje të parë mendon se sot qenka thënë ajo që nuk mund të thuhet, se Berisha po bën fushatë elektorale për Edi Ramën.
Në fakt gjithçka është ironi sepse në foton e publikuar Berisha ka shkruar gjithçka që kjo qeveri ka bërë dhe nuk ka bërë këto katër vite në pushtet.
Në politikë është një shprehje e bukur që kurrë mos thuaj kurrë. Për 27 vite i kemi i parë politikanët tanë që shajnë, mallkojnë, e çfarë nuk i thonë njëri tjetrit, e më pas bëjnë aleanca.
Berishën, Nanon, Metën, Ramën dhe së fundmi Bashën, të gjithë i kemi parë se çfarë nuk thonë për njeri tjetrin e në fund për “interesa të Shqipërisë” bëjnë koalicione dhe marrëveshje.
Pas marrëveshjes së fundit mes Ramës dhe Bashës, në ligjërimin publik, duket se pjesë e marrëveshjes është pakti që mos të bëjnë shumë sulme publikë ndaj njëri tjetrit Rama dhe Berisha.
Rama përmend shpesh se duke votuar PS-në keni dhe PD-në brenda, madje ka thënë se pas 25 qershorit do ta kuptoni. Gjithkund në media flitet për një bashkëqeverisje midis Ramës dhe Bashës.
Ndaj edhe n.q.s ky postim do të ishte vërtetë, ashtu si duket me një shikim të shpejtë, shqiptarëve nuk do tu bënte më përshtypje!
