Mesditën e sotme është afati i fundit për dorëzimin e kandidaturave të demokratëve, që duan të marrin drejtimin e PD-së. Ish-anëtari i Këshillit Kombëtar, Edvin Kulluri dhe anëtari i Këshillit, Fatbardh Kadilli, kishin shpallur në media kandidaturën për kreun e partisë, por pak ditë më parë njoftuan tërheqjen nga gara.
Marrë shkas nga kjo lëvizje, ish-kryeministri Sali Berisha deklaroi se nëse nuk do të ketë kundërshtarë në garën për të zgjedhur kryetarin e ri të Partisë Demokratike, ai do t’i nënshtrohet referendumit të demokratëve. Në konferencën e djeshme për mediat, ish-lideri historik i demokratëve deklaroi se ndaj tij po zhvillohet një fushatë e mirëfinancuar për të denigruar lëvizjen e tij, për marrjen e drejtimit të partisë më të madhe opozitare.
“Do të kandidoj dhe i kam plotësuar dokumentet. Do t’i dorëzoj dhe do t’u drejtohem. Dua të denoncoj se janë miliona para fushatë kundër kandidimit tim. Bëhen emisione a duhet të kandidojë apo jo Sali Berisha. Pyetja e dytë nuk qëndron por i bie që të jem një lider referendar. Nuk ka garë më të rëndësishme. Nuk jam Edi Rama që shpikë rivalë. Atëherë mbetet referendumi”, deklaroi ai.
Sot në orën 09:00, pritet që Komisioni i Rithemelimit të dalë në një deklaratë për mediat.
