Ambasada e SHBA-së i është përgjigjur Berishës sa i takon kritikave të tij në adresë të ambasadores së SHBA-së në Tiranë, Yuri Kim. Ambasada e SHBA-së ka publikuar në “Twitter” një tabelë me të dhëna, ku tregon se numri i personave të shpallur “non grata” nga Uashingtoni është mbi 200. Po ashtu Ambasada Amerikane thekson se nuk ka asnjë të shpallur “non grata” për të cilin të jetë kthyer mbrapsht vendimi.
Zëdhënësi i DASH, Ned Price, u shpreh dy ditë më parë për “Zërin e Amerikës” se Uashingtoni është i shqetësuar nga akuzat që po ngrihen ndaj ambasadores së SHBA-së në Tiranë, Yuri Kim.
Por në lidhje me këtë, dje ka reaguar edhe zoti Berisha, i cili përmes një statusi në profilin e tij në “Facebook”, shkruan se fjalët që ai ka thënë për ambasadoren Kim janë kritika dhe jo sulme. Sipas ish-kryeministrit Berisha, interpretimi i kritikave si sulme nuk është e drejtë, dhe se është formë e pastër bullizmi diplomatik.
Ish-kryeministri Berisha kërkon të dijë nga DASH arsyet se përse e shpallën atë “non grata”, 8 vite pasi ishte larguar nga pushteti. “Por pavarësisht nga të gjitha këto, në një rast unik në histori, Sekretari Blinken i dezinformuar nga lobimi korruptiv i Edi Ramës dhe protektorit të këtij të fundit multimilardierit George Soros ka shpallur me 19 maj 2021 Sali Berishën person “non grata” për korrupsion domethënës. Ky është një rast unik në historinë e botes që një person shpallet “non grata”, 8 vite pasi ka dhënë dorëheqjen nga çdo funksion drejtues dhe duke mos pasur kurrë një akuzë të ngritur për korrupsion nga ndonjë institucion vendas apo i huaj, kundra tij apo familjes se tij dhe tre jave pasi partia e tij humbi zgjedhjet”, nënvizoi Berisha.
