Ish-kryeministri Berisha është shprehur i hapur sa i takon rikthimit të disa prej figurave që kanë dhënë kontribut të madh në PD. Në një takim me intelektualët e qytetit të Shkodrës, Berisha pohoi se janë të mirëpritur të bashkohen dhe madje ka bindjen e plotë se do të kthehen.
Ai shigjetoi kryedemokratin Lulzim Basha, ku sipas tij, ai ka ekzekutuar politikisht personalitetet që kishin 20 vite që kontribonin në PD. Për të, kjo zgjedhje vinte pasi Basha e kuptonte që nuk arrinte t’i tejkalonte.
“Në këto 8 vite, ish-kryetari i PD goditi me “pritë”, ekzekutoi politikisht personalitetet që kishin 20 vite që kontribonin në PD. E gjitha kjo u bë sepse ai duket i kompleksuar, kuptonte që nuk arrinte t’i tejkalonte ato dhe zgjodhi këtë rrugë të gabuar, por ai u largua dhe nga vlerat tona themelore si parti, liritë dhe të drejtat e njeriut. Por në këtë drejtim, trashëgimia jonë janë ato që sakrifikuan më shumë.
Në fakt ata u bënë faktori kryesor i ekzistencës së PD, por ajo trashëgimi u injorua plotësisht. Ju e dini se në këtë 30 vite, PD ka përjetuar vështirësi të madhe. Njeriu i parë që e nisi betejën kundër regjimit ishte i pavdekshmi Pjetër Arbnori.
Të gjitha ia kisha përcjellë ish-kryetarit, por ai largoi partinë nga vlerat e saj. Po përpiqemi të kthejmë të gjithë ata që kanë kontribut në PD, por që u larguan në kundërshtim me normat që ne ndajmë.
Kam kënaqësi që sot fushatën në Shkodër e udhëheq Arben Imami nga Tirana. Të gjithë ata që duan të kthehen te kontributi i tyre, kanë kontribute ata. Jozefina Topalli ka kontributet e saj të pamohueshme. Të gjithë janë të mirëpritur dhe do të kthehen. Ne jemi për hapjen e PD-së, për të gjithë ata që kanë kontributin në këtë parti. Ashtu si do të jemi të hapur për intelektualët”.
