Në një prononcim për mediat në mjediset e Kuvendit, kryetari i Partisë Demokratike, Sali Berisha, përsëriti thirrjen ndaj qytetarëve që ti bashkohen opozitës në shesh, përpara Kryeministrisë. Berisha pohoi se si çdo protestë edhe kjo e sotmja ka skenarin e saj. “Kundër politikës së çpopullimit të Shqipërisë, kundër manipulimit të votës dhe sistemeve elektorale, protestojnë fuqishëm mbarë shqiptarët. Dua të shpreh mirënjohjen dhe ftesën time për qytetarët e Tiranës dhe mbarë Shqipërisë, të bashkohemi në orën 7 para Kryeministrisë për të shprehur me protestën tonë vendimin e shqiptarëve për shpëtimin e Shqipërisë nga regjimi kleptokratik i Edi Ramës”, u shpreh Berisha.
Cili është skenari i protestës?
Protesta ka skenarin e vet. E rëndësishme është që ne të japim mesazhin tonë të fuqishëm, se shqiptarët nuk do ta tolerojnë më këtë regjim.
Do vijojnë protestat?
Kjo është protesta që inauguron procesin e largimit të Edi Ramës nga pushteti. Protestat ndalen vetëm atëherë kur realizojnë qëllimin e tyre madhor.
Në kuadër të protestës që do të zhvillohet në orën 19:00, do të ketë bllokime të disa segmenteve rrugore, si dhe bllokime të pjesshme të disa segmenteve të tjera në varësi të lëvizjes së tubuesve.
Segmentet rrugore që do të jenë të bllokuara, janë:
– bulevardi “Dëshmorët e Kombit”;
– rruga “Gjergj Fishta”;
– bulevardi “Bajram Curri”
– bulevardi Zhan D’Ark
Policia apelon të gjithë qytetarët që të shmangin lëvizjen në këto akse rrugore.
