Ndërsa nga palët politike në Shqipëri nuk ka asnjë sinjal për të zgjidhur krizën në vend, presidenti Meta shpreson në një reflektim, pasi koha po përfundon.
Partia Demokratike dhe Lëvizja Socialiste për Integrim do të protestojnë para Kryeministrisë, në një protestë ku pritet të ketë tensione e përplasje me policinë. Kjo është protesta e katërt e madhe në vend.
Sot parashikohet sërish të ketë skenarë dhune, edhe pse Basha është më i tërhequr, ndërsa Berisha e ka bërë të qartë se kjo është një betejë për jetë a vdekje.
Mbetet të shihet se çfarë do ndodhë, e ndërsa Meta shprehet se mungesa e dialogut të brendshëm politik, cënon procesin e negociatave. “Kam komunikuar në vazhdimësi me Kryeministrin apo ish-ministrin e Jashtëm, për rëndësinë e bashkëpunimit me opozitën në mënyrë të vazhdueshme dhe për domosdoshmërinë për të demonstruar se procesi i integrimit europian është një përgjegjësi e përbashkët, dhe për ta konkretizuar me veprime të përbashkëta që menjëherë pas vendimit të Këshillit në qershorin e kaluar për të rivlerësuar çeljen e negociatave pas një viti.
Më vjen keq të them se mungesa e dialogut të brendshëm politik jo vetëm që cënon seriozisht këtë mundësi, por edhe ka sjellë këtë situatë të përgjithshme jo funksionale të drejtësisë, sidomos mungesa e Gjykatës Kushtetuese ka qenë një problem i madh dhe vazhdon të mbetet.
Gjithë ky proces me shumë aspekte të tjera kanë bërë për fat të keq të pamundur funksionimin e ligjit në vend, por edhe njëkohësisht edhe funksionimin e garancive kushtetuese demokratike për të gjithë, përfshirë edhe qytetarët e thjeshtë dhe interesat e tyre dhe të drejtat e tyre të cilat në letër i garanton më së miri Kushtetuta e Shqipërisë, por që në praktikë e shohim që kanë mbetur pa mbrojtje”, deklaroi Meta.
