Ish-kryeministri Berisha zbuloi se do të garojë në zgjedhjet e 6 marsit për 6 Bashkitë në koalicion me Lëvizjen Socialiste për Integrim. Teksa prezantoi 6 kandidatët fitues të dalë nga zgjedhjet e primares, Berisha bëri me dije se koalicioni në të cilin do të bëjë pjesë edhe LSI-ja, sipas tij, do të quhet “Shtëpia e Lirisë, ndërsa theksoi se po diskutohet edhe për përfshirjen e partive të tjera të vogla opozitare.
“Ne do marrim pjesë në zgjedhje, sepse bojkoti nuk është opsion për ne. Sigurisht që do të hyjmë me një koalicion në përputhje me ligjin, dhe në atë marrëveshje do të paraqitet dhe logo të cilën çdo shqiptar e ka të qartë, se logon e vërtetë tonë e kanë konfiskuar Edi Rama. Ne dalim në koalicion, i cili do të quhet “Shtëpia e Lirisë”, ku LSI është pjesë e koalicionit. Po negociojmë për partitë e tjera”, deklaroi ai.
Tashmë Berisha dhe Meta janë bërë bashkë, duke sfiduar amerikanët dhe tentuar të marrin frenat e opozitës. Ky zyrtarizim vjen në një kohë kur ish-kryeministri është shpallur “non grata”, dhe Ilir Meta pritet të shkarkohet. Kreu i Shtetit, Ilir Meta dhe ish-kryeministri Berisha kanë bashkuar forcat, dhe po sfidojnë hapur amerikanët.
Berisha: Ka pasur bisedime në të gjitha nivelet, kam takuar dhe Metën
Ish-kryeministri Sali Berisha, në një dalje televizive mbrëmjen e së hënës, ka treguar detaje nga marrëveshja e arritur me LSI-në, të cilën e bëri publike gjatë prezantimit të kandidatëve në 6 Bashki. Berisha u shpreh se takimet janë bërë në të gjitha nivelet. Ai madje shtoi se është takuar personalisht dhe me Kreun e Shtetit, Ilir Meta.
“Forcat opozitare janë dhe mbeten aleatë, pavarësisht nëse marrin apo nuk marrin pjesë në këto zgjedhje. Por oportunitetet politike janë oportunitete dhe ata zgjedhin të mos investojnë në këto 6 Bashki. Në fakt nëse unë jam takuar me ta dhe kam zhvilluar takime, Lul Bravën ata nuk e takojnë. Nuk janë pjesë e koalicionit, ata kanë adaptuar këtë qëllim që ne do ja lëmë degëve lokale, për cilin kandidat do mbështesin. Kanë vendosur të mos hyjnë në zgjedhje, të mos maten me këtë proces. Por kjo nuk do të thotë që degët lokale nuk do të mbështesin kandidatët që preferojnë”.
